मा.खा. अशोकजी नेते यांचे विशेष योगदान
विदर्भाची काशी म्हणून ओळखल्या जाणाऱ्या मार्कंडा देव क्षेत्रात दरवर्षी महाशिवरात्रीच्या निमित्ताने लाखो भाविक दर्शनासाठी येतात. गडचिरोली जिल्ह्यातील चामोर्शी तालुक्यात वसलेल्या या ऐतिहासिक आणि नयनरम्य स्थळी भगवान शंकराची स्वयंभू पिंड आहे. पुरातन शिल्पकलेने नटलेल्या या स्थळाला अध्यात्मिक आणि सांस्कृतिक वारसा लाभलेला आहे.
मार्कंडा देवाच्या दर्शनासाठी चंद्रपूर जिल्ह्यातील सावली तालुक्यातील साखरी (सिरशी) घाट हा एक प्रमुख मार्ग आहे. मात्र, नदीच्या पात्रातून पाणी वाहत असल्याने भाविकांना मोठ्या अडचणींचा सामना करावा लागत असे. भाविकांची ही गैरसोय लक्षात घेऊन भाजप तालुका कोषाध्यक्ष किशोरजी वाकुडकर यांनी हा मुद्दा मा.खा. अशोकजी नेते यांच्या निदर्शनास आणून दिला. यावर तातडीने कारवाई करत मा.खा.तथा भाजपा अनुसूचित जनजाती मोर्चाचे राष्ट्रीय महामंत्री अशोकजी यांनी चंद्रपूरचे कार्यकारी अभियंता विवेकजी पेंडे यांच्याशी संपर्क साधून नदीच्या पात्रात रपटा बंधारा उभारण्याची मागणी केली.
त्यांच्या मागणीची तत्काळ दखल घेत प्रशासनाने पुढाकार घेतला. पाण्याचा प्रवाह अडवण्यासाठी रेती भरलेल्या चुंगड्यांच्या साहाय्याने रपटा बंधारा उभारण्याचे कार्य सुरू करण्यात आले. या बंधाऱ्यामुळे भाविकांना कोणत्याही अडथळ्याशिवाय साखरी घाट मार्गे मार्कंडा देवाच्या दर्शनासाठी जाता येणार आहे.
स्थानिक प्रशासन व नागरिकांचे मोलाचे योगदान
या महत्वपूर्ण कार्यासाठी उपअभियंता राजकुमार गेडाम, अभियंता साखरे साहेब,भाजप कोषाध्यक्ष किशोरजी वाकुडकर, ग्रामपंचायत सदस्य तसेच मा.खा. अशोकजी नेते यांचे सहाय्यक व सोशल मीडिया प्रमुख दिवाकर गेडाम,साखरीचे उपसरपंच रविंद्र गेडाम यांच्यासह स्थानिक नागरिकांनी मोलाचे सहकार्य केले.
भाविकांच्या सोयीसाठी उभारलेल्या या रपट्यामुळे यात्रेचा उत्साह अधिक वाढला असून, भक्तांमध्ये आनंदाचे वातावरण निर्माण झाले आहे. भाविकांनी प्रशासनाच्या तत्परतेबद्दल समाधान व्यक्त केले आहे. मार्कंडा देव यात्रेच्या यशस्वीतेसाठी प्रशासन, स्थानिक नेते व नागरिकांचे योगदान निश्चितच उल्लेखनीय ठरले आहे.
